ភ្នំពេញ៖ រដ្ឋាភិបាលជប៉ុនបានផ្តល់ជំនួយឥតសំណងចំនួនជាង១៨ម៉ឺនដុល្លារសហរដ្ឋអាមេរិកដល់កម្ពុជាសម្រាប់កសាងស្ពានបេតុងមួយកន្លែងនៅខេត្តកំពង់ស្ពឺ និងសា្តរប្រព័ន្ធធារាសាស្ត្រក្នុងខេត្តកំពង់ចាម។
ជំនួយឥតសំណងជាង១៨ម៉ឺនដុល្លារនោះ រដ្ឋាភិបាលជប៉ុននឹងយកទៅបែងចែកឱ្យមន្ទីរសាធារណការ និងដឹកជញ្ជូនខេត្តកំពង់ស្ពឺ សម្រាប់កសាងស្ពានបេតុងមួយកន្លែងនៅខេត្តកំពង់ស្ពឺចំនួន ៩៩ ២១២ ដុល្លារអាមេរិក និងសម្រាប់ឱ្យមន្ទីរធនធានទឹក និងឧតុនិយមខេត្តកំពង់ចាម ក្នុងការស្តារប្រព័ន្ធធារាសាស្ត្រក្នុងខេត្ត ដោយប្រើថវិកាចំនួន ៨៧ ៦៤៤ដុល្លារអាមេរិក។
ថ្លែងក្នុងពិធីចុះហត្ថលេខាលើកិច្ចសន្យាផ្តល់ជំនួយឥតសំណងនៅថ្ងៃទី០៥ ខែធ្នូ ឆ្នាំ២០២២ ឧបទូតនៃស្ថានទូតជប៉ុនប្រចាំកម្ពុជា លោក តានិណៃ អ៊ិឈិតុម៉ុ រំពឹងទុកថា គម្រោងសាងសង់ស្ពានបេតុងនៅខេត្តកំពង់ស្ពឺ នឹងផ្តល់អត្ថប្រយោជន៍ដល់ប្រជាជនមូលដ្ឋានចំនួន ៣ ៣០០នាក់ ដោយសម្រួលដល់ការដឹកជញ្ជូនផលិតផលកសិកម្ម ក៏ដូចជាការធ្វើដំណើរប្រចាំថ្ងៃរបស់សិស្សនិងប្រជាជន ទៅកាន់សាលារៀន ផ្សារ និងមណ្ឌលសុខភាពដែលនៅជិតបំផុតពេញមួយឆ្នាំ។
តាមរយៈការកែលម្អប្រព័ន្ធធារាសាស្រ្តនៅខេត្តកំពង់ចាម លោកក៏រំពឹងថានឹងធានានូវការផ្គត់ផ្គង់ទឹកប្រើប្រាស់ប្រចាំថ្ងៃ និងសម្រាប់កសិកម្មដល់ប្រជាជនមូលដ្ឋានជាង ៤ ៥០០នាក់។
លោកឧបទូតនៃស្ថានទូតជប៉ុនប្រចាំកម្ពុជា បានកត់សម្គាល់ថា កម្ពុជាបាននិងកំពុងអភិវឌ្ឍយ៉ាងឆាប់រហ័ស។ ប៉ុន្តែលោកក៏ទទួលស្គាល់ថាកម្ពុជានៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីលើកកម្ពស់គុណភាពនៃជីវភាពរស់នៅរបស់ប្រជាជន។
លោកបានអះអាងទោះបីជាយ៉ាងណា ជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការណ៍សហប្រតិបត្តិការសេដ្ឋកិច្ច និងអភិវឌ្ឍន៍ផ្សេងៗ រួមទាំង “គូសាណូណិ” ផងដែរ។
សូមបញ្ជាក់ថានៅក្នុងរយៈពេល៣០ឆ្នាំចុងក្រោយនេះចាប់តាំងពីឆ្នាំ១៩៩១ ស្ថានទូតជប៉ុនប្រចាំប្រទេសកម្ពុជា បានចូលរួមចំណែកក្នុងគម្រោងជាង៦៦០ នៅទូទាំងប្រទេសកម្ពុជា តាមរយៈជំនួយឥតសំណងគូសាណូណិ៕
